គណៈកម្មការរៀបចំយុទ្ធនាការ “អាហារខ្មែរត្រូវតែខ្លាំង”សូមអញ្ជើញប្រជាពលរដ្ឋខ្មែរគ្រប់រូបចូលរួមគាំទ្រ និងទិញអាហារខ្មែរ

យុទ្ធនាការ “អាហារខ្មែរត្រូវតែខ្លាំង” មានគោលបំណងសំខាន់ ២៖ លើកកម្ពស់សហគ្រិនអាហារខ្មែរ និងបង្កើតមូលនិធិជួយគ្រួសារជនភៀសសឹក។

កម្មវិធីនេះបង្កើតឡើងដើម្បីឱ្យអាជីវករ សហគ្រិន ម្ចាស់ភោជនីយដ្ឋាន អ្នកផលិត និងអ្នកច្នៃម្ហូបថ្មីៗ បានបង្ហាញសមត្ថភាព បង្កើនការលក់ ពង្រីកទីផ្សារ និងបង្កើតមោទនភាពចំពោះអាហារខ្មែរ។

អាហារខ្មែរ មិនត្រឹមតែជារសជាតិប៉ុណ្ណោះទេ ប៉ុន្តែជាប្រវត្តិសាស្ត្រ វប្បធម៌ សេដ្ឋកិច្ច និងអត្តសញ្ញាណជាតិ។

ក្នុងរយៈពេល ៣ ថ្ងៃ នៃយុទ្ធនាការ នឹងមានសកម្មភាពជាច្រើន រួមមានការដាក់តាំង ការលក់ និងការផ្សព្វផ្សាយអាហារខ្មែរ។

កម្មវិធីនេះគ្រោងទាក់ទាញអ្នកចូលរួមយ៉ាងតិច ៣០,០០០ នាក់ ក្នុងរយៈពេល ៣ ថ្ងៃ។

បងប្អូនអាចចូលរួមគាំទ្រតាមរយៈសកម្មភាពងាយៗ ដូចជា នាំក្រុមគ្រួសារ មិត្តភក្តិ និងក្រុមការងារ មកចូលរួមកម្មវិធី ឬចែករំលែកសារអញ្ជើញលើបណ្តាញសង្គម។

ការចូលរួមរបស់បងប្អូន នឹងជួយបង្កើតផលវិជ្ជមានជាច្រើន ដល់អាជីវកម្មខ្មែរ និងសង្គមជាតិ។

អាហារខ្មែរ គឺជាអត្តសញ្ញាណខ្មែរ។ អាហារខ្មែរ គឺជាសុខភាពខ្មែរ។ អាហារខ្មែរ គឺជាសេដ្ឋកិច្ចខ្មែរ។

គាំទ្រអាហារខ្មែរ គឺគាំទ្រសហគ្រិនខ្មែរ។ ទិញអាហារខ្មែរ គឺជួយអាជីវកម្មខ្មែរ និងជួយគ្រួសារជនភៀសសឹក។

នៅពេលប្រជាជនខ្មែររួបរួមគ្នា អាហារខ្មែរ សេដ្ឋកិច្ចខ្មែរ និងសង្គមខ្មែរ នឹងកាន់តែខ្លាំង។

សូមអញ្ជើញចូលរួមជាមួយគ្នា ដើម្បីបង្ហាញថា ប្រជាពលរដ្ឋខ្មែរ អាចរួបរួមគ្នាធ្វើឱ្យអាហារខ្មែរ សហគ្រិនខ្មែរ សេដ្ឋកិច្ចខ្មែរ និងសង្គមខ្មែរខ្លាំងឡើងបាន។